XII. mendekoak dira Enkarterriri buruzko lehen aipamenak, eta 1394koak Abellanedako batzarrei buruzkoak. 1500 urtetik aurrera hasi ziren eskualdeko herriak beren ordezkariak bidaltzen eta garai hartan eraiki zuten Enkarterriko lehenengo Batzarretxea izango zena.

Lehen eraikin hura behin-behinekoa izan zen, eta 1592an eraiki zen gaur egungoa. Halere, XX. mendean aldaketa handiak egin zizkioten eraikinari, eta orduan hartu zuen Batzarretxeak gaur egun duen itxura.

Batzarretxea Sopuertan dago eta lurraldeko askatasun politikoen adierazle izan zen mendeetan zehar. Gaur egun Enkarterrietako Museoa da, eskualdeko historia, ondasuna eta etnografia ikertzeko eta zabaltzeko gunea.