Egun bateko txangoa Güeñesera

Bizkaian bizi bazara eta egun batzuk libre badituzu Gabonetako opor hauetan, Güeñes aukera bikaina da egundoko paisaiaz, txoko ezezagunez eta arkitektura harrigarrienaz gozatzeko. Kadagua ibaiaren urek bustitako haran hau Bilboko erdigunetik 15 minutura baino gutxiagora dago, Eretza mendiaren silueta izugarri eta paregabearen babespean.

❱ Andra Mari eliza.

Güeñesko hirigune historikoan hasiko dugu ibilaldia, Andra Mari elizaren aurrekaldean. XVI. mendeko tenplua apaingarri gotikoz eta errenazentistaz betea dago, eta pieza ikusgarriak ditu barrualdean. Hemendik oso gertu, 200 metro eskasera, Villa Urrutia aurkituko dugu, Güeñesko beste leku zoragarrietako bat.

Gaur egun Udaletxea den eraikin honen historia El Doradoren bilaketarena da ere. Leandro Urrutia indianoaren aginduz eraiki zuten etxea, eta bost kontinenteetatik ekarritako zuhaitz eta landare exotikoz inguratuta dago. Antzinako lorategi horiek ARENATZarte eskultura parkea dira gaur egun. Lorategiko pasealekuek kutsu erromantikoa dute, eta apartak dira ibiltzeko, deskonektatzeko eta inguruneaz gozatzeko.

 

Janztearen artea

❱ Basque Design Center, Lasier auzoan.

10 minutura oinez, Basque Design Center berria altxatzen da, Güeñesko arkitektura- eta ehun-tradizioaren lekukoa hartu duena. Mercedes de Miguelen Janztearen artea erakusketa ikusgai izango da eraikin abangoardistan apirilera arte. Erakusketak Bilboko diseinatzailearen bilduma bakoitzeko pieza adierazgarrienak biltzen ditu. Muntaia harrigarria du erakusketak, goiko solairutik hall-eraino erortzen diren soinekoen kaskadekin. Mercedes de Miguelek goi-mailako joskintza, diseinua eta glamourraren munduan barrena eramango gaituen 30. urteko ibilbidea proposatu nahi digu. Sarrera doakoa da eta, erakusketaz gain, eraikin harrigarriaz gozatzeko aukera izango dugu.

 

Kadaguaren ibilbidea

Güeñes ezagutzen jarraitu nahi baduzu, Kadaguaren ibaiertzetik doan bidegorria jarrai dezakezu Soduperaino (udalerriko auzorik jendetsuenaraino). Mendi-hegaletan sakabanatutako baserri tipiko ugari ikusiko ditugu ibilbidean. Ibilbidetik metro batzuk urrunduz gero, baserri eder eta zaharrenetako bat aurkituko dugu: Errekaldekoa, duela gutxi berritua. Tamaina handiko eraikina da, jatorrizko fatxada eta sarrera arku bitxia gorde dituena mendeetan zehar.

❱ Errekalde baserria.

Sodupen, Eretza mendiaren eta haren silueta berdingabearen babespean, Bizkaiko art déco estiloaren erakusgarri adierazgarrienetako bat dago, 1933an eraikitako sorpresa modernista. Barruan farmazia bat eta etxebizitzak daude. Bere ondoan La Puente dorrea dago. Harrizko eraikina da, almenaduna eta garitekin goiko solairuan. 1681ean berreraiki zuten gaur egun duen itxurarekin.